Кабловските да престанат да манипулираат со корисниците

Александар Момировски	Коментари (2)

Организацијата на потрошувачи бара кабелските оператори да престанат да манипулираат со корисниците во делот на програмската понуда и услугите. Велат дека на нивна адреса во континуитет стасуваат голем број жалби од граѓаните за неправилности.

„Најчесто се однесуваат на пример на промена на самите пакети кои што претходно ги нуделе на потрошувачите, потоа ги менуваат, понатаму на квалитетот на самата услуга, значи некогаш потрошувачите се жалат дека во некој реон има прекини по долг период, не функционира кабелската телевизија, не е добра сликата, не е доволно јасна“, рече Татјана Тасевска, организација на потрошувачи на Македонија.

Организацијата веќе ги алармирала пазарната инспекција и советот за радиодифузија дека операторите им ги кршат правата на потрошувачите и бара да се стави крај на проблемите.

Граѓаните реагираат дека операторите им нудат содржини со слаб квалитет, ТВ канали без превод. Редовна појава се и програмите кои се емитуваат на диво, без платени авторски права, доказ за тоа се и овие инсерти направени од програмите на операторите во неколку градови низ државата вклучувајќи ја и метрополата.

Се пуштаат ТВ канали кои се забранети за емитување. Советот за радиодифузија веќе констатираше дека постои хаос на пазарот на кабелски оператори.

Според претседателот на Советот ваквата појава е резултат на очајничкиот обид на операторите со пиратерија да задржат што поголем број корисници во време кога на пазарот се појавија сериозни компании што нудат пакети со квалитетна програма и висока технологија.

За печатење

Прати по e-mail

Порака до авторот

Разгласи