ЕИБ: Не можеме да ја спасиме Грција

	Коментари (10)

Европската инвестициска банка (ЕИБ), која е главниот кредитор на ЕУ, денеска соопшти дека не може да ја спасува Грција или која и да е друга европска земја која не може да ги плаќа своите долгови, пренесоа американските медиуми.

ЕИБ во денешното коминике забележа дека може „да ги финансира само економски надежните проекти“ и дека нејзините правила не и дозволуваат да и помага на европска членка за да го покрива својот буџетски дефицит.

Банката се спогодува со владите на земјите од ЕУ да ги финансира истражувањата во областа на енергетски ефективни автомобили или инфраструктурни проекти за посиромашните членки на ЕУ.

ЕИБ годинава ќе додели 75 милијарди евра, дополнуваат агенциите.

Економист на „Дојче банк“ бара вонредна помош на ЕУ за Грција

Томас Мајер, главниот економист на „Дојче банк“, која е најголема банка во земјата, изјавува денеска за весникот “Билд“, дека ЕУ би требало, како вонредна мерка „да стори се, за да ја стабилизира Грција и еврото“.

„Притисокот врз еврото се зголемува. ЕУ сега треба да направи се за да ја стабилизира Грција и еврото, но под услови дека Грција ќе ги вложи сите напори од своја страна“, истакнува Мајер.

„Помошта за Грција треба да остане исклучок, затоа што во спротивен случај Монетарната унија може да биде загрозена од сериозна криза“, додава главниот економист на „Дојче банк“.

Лидерите на држави и влади на 27-члената Унија се очекува да се соберат на 11 февруари на средба во Брисел, а прашањето со катастрофалната состојба на грчкиот буџет ќе биде една од главните теми.

За печатење

Прати по e-mail

Порака до авторот

Разгласи