Кои се економските прогнози за 2010?

Анета Додевска	Коментари (3)

Година на политичко искушение. И втората деценија од 21 век ја почнуваме со стариот проблем - спорот за името. Евроинтеграцијата на Македонија ќе биде клучниот настан од кој ќе зависат останатите политички и економски трендови во земјава.

„Владата живее од денес за утре и така ги води работите коишто најмногу ефект пак, имаат на деловната клима во Македонија“, изјави Јани Макрадули, СДСМ.

„Во Шпанското претседателство да биде на еден начин решено, да се направи чекор напред во овој однос, токму да се изгради оној заеднички став“, вели Флора Кадриу, Нова демократија.

И токму епилогот за идната европеизација на земјава ќе ги диктира останатите политички настани во земјава. Без датум за преговори за членство во Унијата, можен ли е распад на актуелната коалиција? Ќе има ли и во 2010 избори?

„Начинот на којшто сега тој ги моделира односите со политичките партнери во Владата, мислам дека нема да биде никакво изненадување да има в година избори“, рече Тито Петковски, НСДП.

„Во моментот кога ние ќе оцениме дека ниту еден од тие принципи не функционира, односно не се спроведуваат договорените работи, тогаш ќе треба да преоцениме дали има простор за понатамошна соработка“, рече Ермира Мехмети Деваја, ДУИ.

Од политичката разврска во 2010, неминовно ќе зависи и економскиот курс на Македонија. Владата, според буџетската проекција, предвидува раст на економија, намалување на невработеноста. Што очекуваат министрите?

„Во буџетските проекции се предвидуваат 2% раст, но би рекол одлучувачки фактор ќе биде движењето на секторот за метали“, изјави Владо Пешевски, вицепремиер за економски прашања.

„Дел од антикризните мерки ќе почнат да ги даваат своите ефекти во наредната година“, истакна Фатмир Бесими, министер за економија.

Штотуку платив рата за кредит, банките во 2009 ги кренаа каматите, Народната банка водеше рестриктивна монетарна политика, банките селективно делеа кредити. Што не очекува во банкарската 2010?

„Ние очекуваме дека 2010 може да донесе значително подобрување во однос на 2009, добро ќе биде доколку постигнеме минимални стапки на стопански растеж“, вели Маја Штериева, директор во „Комерцијална банка“.

„Секој оној клиент кој е здрав, кој има редовни приходи, ќе може да дојде до кредити“, рече Антонио Агрир, НЛБ „Тутунска банка“.

Во година на големи исчекувања, моите колеги велат дека ќе има за што да се пишува и што да се анализира.

„Би требало да се издвојат трговскиот дефицит, прашањето за странските инвестиции, отпуштањата на вработените во повеќе сектори“, изјави Мирче Јовановски

„Македонија ќе биде исправена пред клучен избор. Не го реши ли спорот со името, ќе има безалтернативна економска криза“, нагласи Александар Чомовски, новинар.

Одбројувањето започнува на 1. јануари, следните 6 месеци ќе бидат одлучувачи и за политичката и за економската перспектива на Македонија, не само во 2010-та, туку и потоа.

За печатење

Прати по e-mail

Порака до авторот

Разгласи