Вандалско уништување на Маркови Кули
02.09.2002 00:00
Институтот за старословенска култура од Прилеп најостро протестира поради начинот на кој се изведуваат градежните работи на археолошкиот локалитет Маркови Кули, предупредувајќи дека вандалски се уништува македонското културно богатство. Градежни работи на овој локалитет извршува фирмата „Електро Прилеп“ која неодамна заврши со осветлување на поголемиот дел од локалитетот, а сега гради пат до највисоките делови на локалитетот. „Фирмата „Електро Прилеп“ продолжува работите да ги изведува без стручна консултација и надзор на надлежните институции“, изјави претставникот на прилепскиот Институт Роза Каревска Топузовска. Таа рече дека реагирал и Заводот за заштита на спомениците од Полска, чии експерти дваесетина години работеа на археолошките ископувања и конзерваторско - реставраторските работи на локалитетот. Апели да престанат градежните работи се испратени до министерката за култура Ганка Самоиловска Цветанова, до полската Академија на науките и уметностите, кон кои се придружија и две организации на УНЕСКО, кои се грижат за заштита на културните споменици.
|