Внимавајте, ве снимаат!

Искра Коровешовска	Коментари (6)

Опомена, намалена плата и во најлош случај бркање од работа. Многумина се нашле во вакви ситуации на работните места оти претпоставениот преку камери монтирани низ канцелариите дознал за направената грешка.

Но апсурдот оди до таму што вашиот директор не само што го следи секој ваш чекор, туку навлегува и ви ја нарушува приватноста.

Еден ваков случај регистрирала и дирекцијата за заштита на личните податоци.

„Еден конкретен пример е со вработени инвалидни лица во пекара, од страна на работодавачите. Дирекцијата ја утврди таа злоупотреба и во моментов се работи на отстранување на таа повреда поради злоупотреба на камерите“, изјави Весна Паунковска од Дирекцијата за заштита на лични податоци.

Под мотото „Стоп за лудилото со надзорот“, годинава се одбележува меѓународниот ден „Слобода наместо страв“ - против злоупотребата на податоците и масовниот надзор.

Невладиниот сектор апелира, особено до владините институции, да престанат да регистрираат, контролираат и набљудуваат постојано.

Луѓето не се информирани дека се крши нивната приватност и се плашат да реагираат храбро и да си ги бранат правата.

Освен видео надзорот, злоупотреба на приватноста и личните податоци е најчеста преку интернет.

„Пробивање на кориснички профили на социјалните мрежи, менување на податоци и на фотографии“, објаснува Ирина Шумадиева од невладината „Метаморфозис“.

Еден од начините е и користењето на електронските картички, тргувањето преку интернет, т.н. електронска комерција.

„Кражба на картичка и при тоа, за жал, кражба на пин-кодот. Ги копираат податоците од магнетната лента и произведуваат уште една фалсификувана картичка“, смета Игор Давчевски од „Тутунска банка“.

Невниманието и неинформираноста се најголемите непријатели, апелираат познавачите.

Знаејќи го вашиот матичен број и други лични податоци, некој може целосно да го конструира вашиот идентитет и наместо вас да се претставува пред институциите, банките, да подигнува пари, а сето тоа да изгледа како да сте го направиле вие.

За печатење

Прати по e-mail

Порака до авторот

Разгласи