Светските медиуми со позитивни оценки за изборите

	Коментари (6)

Конечната одлука за новиот македонски претседател на 5 април

Претседателските избори во Македонија кои се клучен тест за аспирациите на земјата за членство во ЕУ и НАТО, поминаа мирно и без насилство, е генералната оценка на странските медиуми за вчерашниот изборен процес.

„Би-Би-Си“ во информацијата за изборите објавена како прва вест на нејзиниот веб-сајт за Европа, наведува дека гласањето минало без инциденти, дури и во областите во северозападна Македонија, каде што на минатогодишните вонредни парламентарни избори беа регистрирани насилства.

„Дојче веле“ констатира дека првиот круг од изборите минал мирно и оти конечната одлука кој ќе биде новиот македонски претседател ќе треба да се донесе во вториот круг на 5 април.

Мирните претседателски и локални избори беа во контраст со насилството што се случи на минатогодишните парламентарни, кои се заканија да го забават процесот на интеграција на Македонија во ЕУ, објави „Ројтерс“.

Резултатот што се очекува од изборите во Македонија, пишува рускиот весник „Комерсант“, не е само кој ќе биде новиот претседател, туку и како ќе помине гласањето, од кое во голема мера зависи членството на земјата во ЕУ и НАТО.

Грчкиот весник „Елефтерос типос“ коментира дека премиерот Никола Груевски на изборите постигнал две цели - победа во првиот круг на неговиот претседателски кандидат Ѓорге Иванов и исполнување на критериумот за мирни избори без насилство. Весникот оценува дека по вчерашните избори со сигурност ќе се засили политичката моќ на Груевски.

Грчката национална телевизија ЕРТ, пак, оценува дека не се очекуваат големи политички промени во Скопје по изборите со оглед на ограничената улога што ја има претседателот во надворешната политика.

За печатење

Прати по e-mail

Порака до авторот

Разгласи